Protestat kundër rritjes së çmimeve shtrihen në të gjithë Shqipërinë

March 11, 2022

Protesta kundër rritjes së çmimeve është shtrirë në disa qytete të Shqipërisë. Ditën e djeshme në kryeqytet u tubimi dytë përballë Kryeministrisë, ku protestuesit vijuan duke bllokuar disa rrugë kryesore. Protesta u shoqërua më përplasje fizike dhe arrestime. Në të njëjtën kohë u protestua në Durrës, Dibër, Korçë, Mirditë, Shkodër. 

Ditën e sotme protestës i janë bashkuar studentët e Universitetit Bujqësor të Tiranës, të cilët kanë bojkotuar mësimin dhe kanë dalë në rrugë. Po ashtu edhe studentët e Universitetit të Korçës kanë bojkotuar mësimin ditën e sotme.

Një student gjatë fjalë së tij për mediat u shpreh se protesta e tyre përballë Ministrisë së Arsimit është sepse studentëve nuk u janë plotësur kërkesat. 

“Ne u ndalëm këtu, se nuk na janë plotësuar kërkesat tona. Na kanë vënë lakun në fyt, duke na rritur çmimin e urbanit, të bukës, të energjisë. Është e papërballueshme. Kjo është ministria e ç’arsimit, e turpit!”,u shpreh studenti.

Studentët kanë njoftuar së do i bashkohen protestës dhe kanë bërë thirrje për t’u mbledhur në orën 16:30 në oborret e fakulteteve përkatëse, për t’u bashkuar më pas tek Kryeministria.

Qytetarët në Durrës bllokuan autostradën Tiranë-Durrës dhe ka pasur të shoqëruar.

Edhe në Dibër është protestuar ditën e djeshme, ndërkohë që është njoftuar protesta e radhës ditën e sotme në orën 17:00 në afërsi të mbikalimit tek Lagjja e Re në Bulqizë, rruga nacionale Peshkopi – Tiranë.

Protestë ka pasur edhe në Korçë, ku sot është shoqëruar me përplasje fizike me policinë. Protestuesit kanë tentuar të thyejnë kordonin e policisë. Ndërsa, në Mirditë protestuesit bllokuan  “Rrugën e Kombit”, më pas policia ka arrestuar 5 prej tyre dhe ka shpallur në kërkim 13 të tjerë. 

“Bllokuan rrugën duke mos lejuar kalimin e automjeteve në të dy senset e lëvizjes në rrugën e kombit, arrestohen në flagrancë 5 shtetas, si dhe shpallen në kërkim 13 të tjerë”, thuhet në njoftimin e Policisë.

Në Durrës janë arrestuar dy protestues dhe janë shoqëruar rreth 50 të tjerë. Protesta në Tiranë është shoqëruar gjithashtu me arrestime të dhunshme, sikurse ditën e parë. Janë arrestuar 23 protestues dhe janë proceduar penalisht 23 të tjerë.

Kërkesat e protestuesve janë ulja e çmimit të naftës, ata i kërkojnë qeverisë që të marrë masa ndaj operatorëve që kanë rritur çmimin e naftës dhe të produkteve të tjera ushqimore. Sektor të ndryshëm të prekur nga çmimi i naftës i janë bashkuar protestës. Ditën e sotmë ka protestuar shoqata e taksive, ndërkohë përballë Kryeministrisë janë bashkuar përfaqësues të transportit publik, fermerë, para dhe tetraplegjikët, biznesi i vogël dhe i mesëm etj.

Në datën 5 Mars, nafta arriti një çmim prej 230 lekësh në disa nga pikat kryesore të karburanteve në vend. 

Qendra “Konsumatori Shqiptar” (QKSH) i ka dërguar një ankesë Autoritetet të Konkurrencës. Shqipëria është vendi me çmimin më të lartë të naftës në rajon.

“Takim mes qeverisë dhe furnizuesve të naftës”

Kryeministri Edi Rama zhvilloi ditën e sotme një takim me furnizuesit e naftës, pas protestave të zhvilluara. Rama u shpreh se qeveria do të hyjë në administrimin e furnizimit me naftë.

“Në këto kushte, ne do të kalojmë brenda 24 orësh një akt normativ me fuqinë e ligjit dhe qeveria do të hyjë në administrimin e furnizimit bashkë me ju, përmes një bordi kombëtar të furnizimit me karburant”, tha Rama. 

Ai shtoi se qeveria do të përdorë Albpetrolin për të krijuar rezervën e saj të naftës.