Ekspozitë: Sindikalizmi i punonjësve të telekomunikacionit në fotografi

May 05, 2023

Një ekspozitë fotografike që memorizon historinë e Sindikatës së Punonjësve të Postë-Telekomit Shqiptar u mbajt në Teatrin e Operas dhe Baletit mbrëmjen e shkuar.

Kjo ekspozitë, realizuar me mbështetjen e fondacionit gjerman në Tiranë, “Friedrich Ebert” shërbeu si një mënyrë për të festuar 32 vjetorin e krijimit të sindikatës dhe për të sjellë në vëmendje luftën e përditshme për më shumë të drejta e kushte të mira në punë.

Punonjës të telekomunikacionit dhe njëherazi anëtarë të rinj të sindikatës shprehën nevojën për të qenë të përfshirë sindikalisht.

Punonjëse e Teleperformancë Durrës

“Problematikat mund të jenë të shumta, por kryesorja ishte problematika e pagesës, e cila kishte një diferencë midis pagesës së Teleperformancës së Durrësit dhe asaj të Tiranës. Gjë që u arrit falë marrëveshjes me sindikatën dhe pse jo shpresojmë për arritje të tjera”,-shprehet Xheni punonjëse prej 12 vitesh në kompaninë “Teleperformancë” dhe pjesë e sindikatës prej dy vitesh.

Xheni shprehet se përfshirja e sa më shumë punonjësve në sindikata mbetet ende sfidë.

“Ne nuk është se e kemi në mentalitet anëtarësimin në sindikata, nuk është se kemi njohuri maksimale për sindikatat dhe kjo është sfida më e madhe për të thithur sa më shumë anëtarë”.

Paga mbetet një nga kërkesat e punonjësve të telekomunikacionit.

Elda Demalli, punonjëse e One Telecomunication

“Janë shumë problematika, kryesorja është paga. Problemet mund të zgjidhen nëpërmjet kontratës kolektive që kjo kontratë kolektive ofrohet vetëm nga sindikata. Është një sfidë shumë e madhe dhe urojmë që ta finalizojmë sa më shpejt dhe në të mirë të të gjithë punonjësve”,-shprehet Elda Demolli, punonjëse e One Telecomunication, e anëtarësuar në sindikatë vetëm pak muaj më herët.

Për drejtuesin e sindikatës, Renato Muçaj kontrata kolektive është një nga arritjet e sindikatës këto vite.

Renato Muçaj, SPPT

“Një nga arritjet kryesore të cdo sindikate është firmosja e kontratës kolektive. Kontratat kolketive janë ato që mborjnë punonjësit, janë garania e tyre për vendet e punës, për rritje te pagave. Ne kemi qenë nga sindikatat e para në Shqipëri që në vitin ’93 që kemi firmosur kontratën e parë kolektive. Përsëri jemi sindikata e parë në 2021 që kemi firmosur një kontratë kolektive me kompaninë “Teleperformancë” për mbrojtjen e punonjësve në sektorin call center”,-tha për Citizens Channel, Muçaj.

Sindikata e Punonjësve të Postë-Telekomit Shqiptar (SPPTSH) përfaqëson 1000 punonjës në sektorin e telekomunikacionit, 2200 punonjës të postave dhe 4000 punonjës të call center-it.

Renato Muçaj thekson se rritja e pagave mbetet një nga sfidat e sindikatës.

“Një nga sfidat kryesore mbetet sigurisht nivelet e pagave. Rritja e pagave janë objektivi jonë i ardhshëm për kontratat e reja kolektive, pasi me rritjen e çmimeve punonjësit janë më shumë në vështirësi dhe këto paga nuk i dalin qoftë edhe për shpenzimet e tyre ditore. Ajo që ne synojmë është që të ketë një sistem për rritjen e pagave, pra vit pas viti të ketë rritje page. Jo një fushatë dhe le të rrisim pagat sot, por të ketë një vazhdimësi. Dhe këtë sigurisht e garantojnë kontratat kolektive”,-përfundon Muçaj.